Գաղտնիության քաղաքականություն

Գաղտնիության այս քաղաքականությունը բացատրում է, թե ինչ անձնական տվյալներ է հավաքում Wardrobe-ը, երբ դուք օգտվում եք wardrobe.am կայքից և iOS-ի ու Android-ի համար Wardrobe հավելվածից, ինչու ենք մենք դրանք հավաքում, ում ենք փոխանցում և ինչ ընտրություն ունեք դուք։ «Wardrobe», «մենք» և «մեզ» բառերն այստեղ նշանակում են ծառայությունը զարգացնող թիմը։

1. Ինչ է անում Wardrobe-ը

Wardrobe-ը համեմատում է նորաձևության բրենդների ապրանքների գները տարբեր երկրներում նրանց պաշտոնական առցանց խանութներում և տեղեկացնում է, երբ գինն իջնում է կամ անհրաժեշտ չափսը նորից առկա է։ Ապրանքները դուք գնում եք հենց խանութների կայքերում, իսկ Wardrobe-ն ինքը ոչինչ չի վաճառում։ Եթե ավելացնենք նոր ծառայություններ, որոնց այլ տվյալներ են պետք, մինչև դրանց գործարկումը կթարմացնենք այս քաղաքականությունը։

2. Ինչ տվյալներ ենք հավաքում

Ձեր հաշիվը։ Երբ ստեղծում եք հաշիվ, մենք ստանում ենք ձեր էլ. փոստի հասցեն, անունը և գաղտնաբառը, իսկ եթե մուտք եք գործում Google-ի միջոցով, ձեր անունը և էլ. փոստի հասցեն մեզ է փոխանցում Google-ը։ Գաղտնաբառը պահում է միայն մեր մուտքի ծառայությունը և միայն այնպիսի տեսքով, որից հնարավոր չէ այն վերականգնել, ուստի ոչ ոք, այդ թվում՝ մենք, չի կարող այն կարդալ։ Անձնական տվյալներում կարող եք նաև նշել ձեր հեռախոսահամարը, սեռը և ծննդյան ամսաթիվը։ Մենք պահում ենք նաև այն լեզուն, որով օգտվում եք Wardrobe-ից, որպեսզի մեր նամակներն էլ ստանաք այդ լեզվով։

Ինչ եք պահում և հրապարակում։ Ձեր նախընտրածները, հավաքածուները և գնային ծանուցումները (ապրանքը, չափսերը և երկրները, որոնց հետևում եք), իսկ եթե մասնակցում եք Wardrobe Creator ծրագրին՝ նաև հեղինակի պրոֆիլը (օգտանունը, ցուցադրվող անունը, նկարագրությունը և սոցցանցերի հղումները)։

Տեղեկագիր։ Եթե բաժանորդագրվել եք՝ ձեր էլ. փոստի հասցեն և սեռը։ Դրա համար հաշիվ պետք չէ։

Ինչ եք դիտում և որոնում։ Վերջերս դիտված ապրանքներն ու հավաքածուները՝ ձեր սարքում, իսկ երբ մուտք եք գործել՝ նաև ձեր հաշվում, որպեսզի ցանկը հասանելի լինի ձեր մյուս սարքերում էլ։ Մենք նաև հաշվում ենք, թե քանի անգամ է դիտվել յուրաքանչյուր ապրանք և հավաքածու։ Այդ թվերը ձեզ հետ կապված չեն։ Ձեր որոնման հարցումներն ուղարկվում են մեզ՝ արդյունքները գտնելու համար, իսկ վերջին որոնումները պահվում են միայն ձեր սարքում։

Տեխնիկական տվյալներ։ Ձեր IP հասցեն, դիտարկիչի և սարքի տեսակը, սխալների մասին հաշվետվությունները։ IP հասցեն օգնում է մեզ պաշտպանել Wardrobe-ը չարաշահումներից (օրինակ՝ մեկ հասցեից չափազանց շատ հարցումներից) և հյուրի դիտումը հաշվել միայն մեկ անգամ։ Ձեր անվտանգության համար մենք պահում ենք, թե որ սարքերից և IP հասցեներից եք մուտք գործել, ինչպես նաև երբ եք վերջին անգամ մուտք գործել և օգտվել Wardrobe-ից։

Կայքի վերլուծություն։ Կայքում վերլուծական ծառայությունները գրանցում են, թե ինչպես են օգտագործվում էջերը, այդ թվում՝ էջում ձեր կատարած գործողությունները, առանց ձեր մուտքագրած տեքստի։ Մանրամասները՝ Cookie-ների քաղաքականությունում։ Հավելվածը վերլուծական ծառայություններ չի օգտագործում։

3. Ինչի համար ենք դրանք օգտագործում

• ձեր հաշվի և ձեր օգտագործած գործառույթների՝ նախընտրածների, հավաքածուների, գնային ծանուցումների և հեղինակների էջերի աշխատանքն ապահովելու համար,
• ձեր խնդրած նամակներն ուղարկելու համար՝ գնի և առկայության մասին ծանուցումներ, հաշվի վերաբերյալ նամակներ (օրինակ՝ էլ. փոստի հասցեի հաստատում կամ գաղտնաբառի վերականգնում), իսկ եթե բաժանորդագրվել եք՝ տեղեկագիր,
• ձեր լեզուն, արժույթը և բաժինը հիշելու, ինչպես նաև վերջերս դիտված ապրանքներն առաջինը ցույց տալու համար,
• Wardrobe-ը պաշտպանելու և չարաշահումները կանխելու համար,
• սխալները գտնելու և ուղղելու, ինչպես նաև Wardrobe-ի օգտագործումը հասկանալու և այն բարելավելու համար,
• օրենքի պահանջները կատարելու համար։

Մենք չենք վաճառում ձեր անձնական տվյալները։

4. Իրավական հիմքեր

Մենք մշակում ենք ձեր տվյալները՝ այն ծառայությունը մատուցելու համար, որում գրանցվել եք, ձեր համաձայնությամբ, որը կարող եք ցանկացած պահի հետ վերցնել (օրինակ՝ տեղեկագրի կամ cookie-ների դեպքում), Wardrobe-ն անվտանգ ու ավելի լավը դարձնելու մեր օրինական շահից ելնելով, ինչպես նաև երբ դա պահանջում է օրենքը։ Անձնական տվյալները մշակում ենք «Անձնական տվյալների պաշտպանության մասին» Հայաստանի Հանրապետության օրենքին համապատասխան։

5. Ում ենք դրանք փոխանցում

Ծառայություններ մատուցողներին, որոնք օգնում են մեզ ապահովել Wardrobe-ի աշխատանքը (հոսթինգ, նամակների ուղարկում, սխալների հետևում և վերլուծություն) և կարող են տվյալներն օգտագործել միայն դրա համար։

Այլ մարդիկ տեսնում են այն, ինչ հրապարակում եք։ Հեղինակի պրոֆիլը և «հրապարակային» հավաքածուները տեսանելի են բոլորին, իսկ «հղումով» հավաքածուները՝ հղումն ունեցող յուրաքանչյուրին։ Ձեր «անձնական» հավաքածուները, նախընտրածները և գնային ծանուցումները տեսանելի են միայն ձեզ։

Խանութներ։ Երբ ապրանքը բացում եք խանութի կայքում, դուրս եք գալիս Wardrobe-ից, և գործում է այդ խանութի գաղտնիության քաղաքականությունը։ Մենք ձեր հաշվի տվյալները չենք փոխանցում խանութներին կամ առաքման ընկերություններին։ Ապրանքների լուսանկարները բեռնվում են անմիջապես բրենդների սերվերներից, ուստի նրանք տեսնում են ձեր IP հասցեն։

Պետական մարմիններին՝ երբ դա պահանջում է օրենքը, կամ մեր օգտատերերի և Wardrobe-ի իրավունքներն ու անվտանգությունը պաշտպանելու համար։

Եթե Wardrobe-ն անցնի այլ կազմակերպության, օրինակ՝ դրա համար ստեղծված ընկերության, ձեր տվյալները կանցնեն նրան, և այս քաղաքականությունը կշարունակի գործել։

6. Որտեղ են մշակվում տվյալները

Մենք և մեր ծառայություններ մատուցողները կարող ենք ձեր տվյալները պահել և մշակել Հայաստանից դուրս։ Մենք աշխատում ենք միայն նրանց հետ, ովքեր պարտավորվում են պաշտպանել դրանք։

7. Որքան ժամանակ ենք դրանք պահում

Մենք պահում ենք տվյալները միայն այնքան, որքան դրանք անհրաժեշտ են վերը նշված նպատակների համար, կամ որքան պահանջում է օրենքը։ Հաշվի տվյալները պահվում են, քանի դեռ հաշիվը գոյություն ունի, տեղեկագրի տվյալները՝ մինչև դրանից հրաժարվելը, իսկ տեխնիկական տվյալները՝ միայն այնքան, որքան անհրաժեշտ է անվտանգության և խափանումների վերացման համար։ Ջնջված հաշիվը կարող եք վերականգնել՝ 7 օրվա ընթացքում նորից մուտք գործելով։ Դրանից հետո այն ընդմիշտ ջնջվում է իր մեջ պահված ամեն ինչի հետ միասին, իսկ սահմանափակ ժամանակ անց ջնջված տվյալներն անհետանում են նաև պահուստային պատճեններից։ Ձեր սարքում պահվող տվյալները մնում են այնտեղ, մինչև դրանք մաքրեք կամ ջնջեք հավելվածը։

8. Ձեր իրավունքները

Ձեր անձնական տվյալները կարող եք դիտել և ուղղել ձեր հաշվում, իսկ հաշիվը ջնջել «Մուտք և անվտանգություն» էջում։ Ցանկացած պահի կարող եք ջնջել գնային ծանուցումները և հրաժարվել տեղեկագրից։ Տեղեկագրից հրաժարվելուց հետո կշարունակեք ստանալ ձեր հաշվի վերաբերյալ նամակներ և ձեր կարգավորած գնային ծանուցումները։ Կարող եք նաև խնդրել ձեր տվյալների պատճենը, խնդրել ուղղել կամ ջնջել դրանք, առարկել դրանց օգտագործմանը կամ սահմանափակել այն, ինչպես նաև հետ վերցնել ձեր համաձայնությունը՝ գրելով support@wardrobe.am հասցեին։

9. Անվտանգություն

Մենք պաշտպանում ենք ձեր տվյալները գաղտնագրված կապի, գաղտնաբառերի անվերծանելի պահպանման և միայն անհրաժեշտ անձանց հասանելիության միջոցով։ Ամբողջովին անխոցելի համակարգեր չկան, բայց մենք անում ենք ամեն ինչ, որ ձեր տվյալներն ապահով լինեն, և արագ կգործենք, եթե ինչ-որ բան սխալ գնա։

10. Երեխաներ

Wardrobe-ը նախատեսված չէ 16 տարեկանից փոքր երեխաների համար, և մենք գիտակցաբար չենք հավաքում նրանց տվյալները։ Եթե կարծում եք, որ երեխան մեզ անձնական տվյալներ է տրամադրել, գրեք մեզ, և մենք կջնջենք դրանք։

11. Քաղաքականության փոփոխություններ

Յուրաքանչյուր փոփոխություն հրապարակում ենք այս էջում՝ վերջին թարմացման նոր ամսաթվով։ Էական փոփոխությունների մասին կտեղեկացնենք կայքում, հավելվածում կամ էլ. փոստով։

12. Կապ

Այս քաղաքականության կամ ձեր տվյալների վերաբերյալ հարցերով գրեք support@wardrobe.am հասցեին։